Mandompakkon Horja “Panabarion” Binobahon ni Datu

Pamungkah. Namasa on i Pangambatan. Bani bona ni tahun 1944. Tingki mambahen horja pangusiron bala atap na ginoran panabarion i huta ai, na binobahaon ni pitu datu, na itujuhon hubani halak Kristen na parlobei ihuta ai, tingki Pandita J Petrus Purba panorang ai mengaidangi sebagai Guru Zending i huta ai. Tapi kuasa ni Jesus do na monang. Anjaha dobni datu na mambobahon ai porsaya anjaha tardiri. On ma panuri-nurihon ni Pandita ai pasal namasa ai, na itulis bani buku biografini, Hamuliaon-Mu do na Huhasiholi, Ham Jahowa” (hal. 42-43).

BANI bonani tahun 1944, roh ma tonah ni guru huta ase iadongkon “panabarion”. Lang hubotoh tangkas atap halani na tambahin do na ra manjalo Ambilan na Madear tarlobih na maposo, sonai dakdanak na marsikolah pe lambin buei, gabe iadongkon horja panabarion i huta ai.

Memang horja na somal do panabarion bani hasipajuh begu beguon. Paima in pe domma ongga hudidah sonai inang nami, horja na sonin. Halani ai lang pala sai tarsonggot uhurnami.

Hansa na mambahen sungkun sungkun janah songon na targanggu pangahap, halani datu ampa ganup na manabari manggantih hata hatani panabarion ai. Somal ni atap naborit, atap setan atap aha pe na ipindohon “misir/muli” marhitei panabarion ai, hubani sada ianan do ihatabon. Lang hubani jolma. Tapi on, itukar sidea ase hubennarni. Hubani Parki (Parugama Kristen).

Tangkas do hudingat na masa ai. Piga piga ari paima horja ai, itingtingkon guru/datu ma ase ganup pangisi ni huta Pangambatan mangadongkon horja “Panabarion” mangusir bala na roh hu huta ai. Domu hujin itingtingkon datu ma:

a) Haganupan rumah ase ibahenma inggot”bonang manalu”(bonang merah, putih ampa sibirong) ampa lambei gorsing.

b) Ilobei ni rumah ni bei ipasirsir horsik ampa kaling kaling na boi marsora anggo iantuk.

Ganupan ma manlaksanahon anjuran ni Datu/Guru in. Hansa anggo hanami pos tumang do uhumami bani kuasa ni Jesus. Lang hubotoh atap halani biar atap halani holong ni uhur ni Namaposo Parguru Doding ai bennami. Anggo sidea lang adong na ra mangihatkon acara in. Tapi i rumah do sidea haganup tumpu.

Saud ma ilaksanahon acara in domu hubani panorang na dob itontuhon Datu. Ganupan domma sirsir. Piga piga humbani acara in na ididah anjaha tangkas itangar hanami :

Bod ari (sore sore), martumpu ma pitu halak datu. Dob ipasirsir sidea sagala na porlu, marbaris ma datu na pitu ai mardalan manginggoti huta ai piga piga hali.

Bodarini sompong ma itangar hanami sorani kaling kaling atap botol botol ampa dasor/lantei, dingding ni rumah iantuki. Ai ma na isobut sidea “mamburbari”. Deba manampaki horsik na dob tumpu ilobei rumah ni sambil marsurak surak:

Tanduk ni bedu, butar butar

Muli ma begu begu,

hu ruma guru pakon hu ruma ni Parki (Kristen)
Air Terjun Sipisopiso. Ianan on ma somalni ianan pangusiron ni sagala na ulang bani horja hasaparion pangusiron bala. Pangambatan lang piga daoh hu buttu ni Sampuran on

Marsisungkunan ma hanami, mase sonai hata hata ni ai ?. Sonaha do somalni ?. Dong ma namaposo ai patugahkon : “somalni hu sampuran do ai isuruh “muli”. Tapi lang hujai be isuruh guru huta ai. Hu rumah on do !”, nini.

Age pe sonai keadaan ai, pos tumang do uhumami bani kuasa ni Jesus. Sonang do hanami haganupan modom sabornginni ai. Anjaha lang adong na isoroh begu atap na mahua-mahua. Sabalikni, patarni, na tangar ma barita marujung goluh niombah ni datu huta ai. Pusok tumang do uhumami manangar ai.

Tapi lanjar ijin ma ididah hanami kuasa ni Jesus do na marhorja manjagai hanami. Anjaha lang piga dokah dob na masa ai, sirsir ma age datu on manjalo Ambilan na Madear, anjaha manjalo Pandidion Namapansing. (ch/map)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s