Pdt DR. Armensius Munthe, MTh: Anggo roh bapanta on domma marmalas ni uhur halak

 Salinan/transkrip Ambilan ni mantan Ephorus GKPS Pdt. Dr. Ambilan ni Armensius Munthe, MTh, paima pamasukkon hu rumah-rumahni bangkei ni Pdt J Petrus Purba, bani Selasa 30 November 2004

Pdt DR A. Munthe dan isteri (Armensiusmunthe”s Weblog)

“Jenges ni in iatas dolog nahei ni parambilan na madear, na patangarhon hadameion, na mangambilankon ambilan na madear, na pabogeihon haluahon, na mangkatahon bani Sion: Naibatamu do bangkit raja“. – Jesaya 52:7

LANG hubotoh sadiha daohma idalani bapanta on sapari, sanggah Pandita ia mulai tahun 1952 das hu sonari. Hanya piga-piga bulan parpudian on hansa ia lang mardalan. Anggo lang manlangkah do ia. Hubotoh tangkas roh bapanta on domma marmalas ni uhur halak.

Anggo i Pangambatan sagala umurhu das huatas, ganupan do mananda tulang on. Goranni pe ibotoh do. Jadi anggo au hutandai do nasiam laengku haganupan, sonai age Pdt. Christianus. Etek-etek pe nasiam nabaruon.

Au do paompohon bapanta on. Domma halongangan ai kan? Halani Guru do naboron tulang on i Pangambatan, garama dope, au marsikolah ma mulai, anggo lang silap au kalas sada atap kalas dua ma au ijai. Haganupan hanami murid-murid ni tulang on ipaksahon ma mardalan nahei hun Situnggaling mangalo-alo nanturang on. Ai ma ge. Ase hanami do paompohon tulang on, mangalop nanturang on han Tigarunggu. Ganup anak sikolah marodor ma mangalo-alo. Kan nadihut ma au paompohon Tulang on? Jadi humbani haganupan Pandita, au ma sidohoran hubani Tulang on. Ai ma sada.

Sanggah parkawin ni Bapanta on dohot inangta on, sipele begu dope au. Agepe domma martonggo, sipele begu dope au. Roh ma mangungsi, pindah ma bapanta on hu Saribudolok. Tammat ma homa au sikolah, mulak ma pangungsi, ipindahkon ma au hu Saribudolok. Hujabu ni ise ai i Saribudolok? Hujabu ni inangta, bapanta on ma hanami par-Pangambatan sahuta. Asal ma pukul 9 (siah) borngin haganup anak sikolah par-Purbasaribu/Haranggaol pakon Pangambatan ipatumpu bapanta on ma. Martumpu….martumpu, nini bapanta on. Dobni ibahen ma partonggoan tiap-tiap borngin, sipele begu dope hanami. Partonggoan, mandoding, mambasa, marambilan, pnl. Dobni, ima bana hujin, Kristen ma au nini uhurhu. Ra ma au marguru tardidi. Tardidi ma au mintor ibahen ma homa manaksihon.

Sanggah i Pangambatan Bapanta on, au ma saksi hidup. Jolom do lalab buku catatan ma marisi Bahasa Inggris, ipudina Bahasa Indonesia. Lao mardalan tulang on hu huta Sanggar atap huta Baringin jolom do lalab catatan on — to eat: makan, to walk: berjalan…. Sonai ma torus sadokah itanda hanami. Age huja…. ase ibotoh bapanta on Bahasa Inggris, ai sedo na iguruhonni i parsikolahan ai. Belajar sandiri. Anggo Bahasa Belanda iguruhon i parsikolahan. Tapi anggo Bahasa Inggris, belajar sandiri. Itu luar biasa.

Tapi age pe sanggah manghapal tulang on, sise do ia anggo jumpah pakon hasoman i tongah dalan. Basar do tong tulang on. Tambahni: ise iahap nasiam pandita na matua na humbani dasarni Sikolah Pandita na boi mangimbangi tulang on? Au ma marsaksi, satu-satunya bapanta on yang mampu berbahasa Belanda, Bahasa Inggris, Bahasa Jerman, Bahasa Junani pakon Bahasa Heber. Lima bahasa penting ikuasai tulang on. Anggo tammat Sarjana Theologia ia, pantas ningun. On lang…. asal roh tamu hun Jerman, ipatandahon, mintor ibahen bapanta on do Bahasa Jerman atap Bahasa Inggris. Ise ma na songon ai Pandita ni GKPS? Bahasa Heber? Memang iguruhonni bahasa ai sanggah i Jerman. Tapi lang holan ai, Bahasa Gorik. Dosen do au, jurusan PL ma au, tapi malonan dope tulang on Bahasa Gorik daripada au. Luar biasa…. luar biasa…. lang marnaloja.

Memang langkah ni tulang on, langkah ni siboban Ambilan na Madear, patugahkon Ambilan na Madear, ambilan haluahon, patugahkon bani jolma in, Jesus do Raja. Lang marnaloja das hubani ujungni.

Ise ma Pandita ni GKPS humbani saparinari na mampu mandalankon langkah ni Parambilan na Madear in hu Rumah sakit? Tiap-tiap ari rata-rata tolu atap oppat Rumah Sakit idalani i Siantar on. Sapari mar-gubel. Halani matua, lang ilopas niombahni mar-gubel be, mar-sudako, mardalan ia mangidangi. Ise Pandita ni GKPS na mampu sonai ai? Kristen, naso Kristen, anggota ni GKPS, nalang anggota ni GKPS, pasti iparsahapkon, itonggohon bapanta on. Anggo Islam lang pala itonggohonni.

Das hubani ujung ni goluhni, manlangkah Bapanta on padaskon Ambilan haluahon ai hubani naboritan i Rumahsakit. Luar biasa. Oppat, lima rumahsakit na banggal idalani.

Jadi sanggah Ephorus au, aktif do tong bapanta on mangambilankon Ambilan na Madear in. Huhatahon do hubani Bapa on, “Anggo adong ididah ham na boritan i Rumahsakit, na porlu tumang kehadiran ni Ephorus, hatahon ham hubangku.” Idalankon Bapanta on do ai, sadokah 13 taun au Ephorus. Paling sikit 2 (dua) hali sabulan malapor tulang on hubangku. Anggo adong tamungku naboron i Kantor Pusat, lang ra tulang on mangganggu. Ibuka pintu, ididah adong tamu, lang masuk ia. Marbahasa Jerman ma ia hubangku, manghatahon, “Adong naboritan i rumahsakit sonon, nomor nasaon, goranni songon on, hun huta on,” dob ai laho ia. Asal ihatahon tulang on sonai hubangku, bodarini ai maningon hurohi….

Bayangkon nasiam. Janah bani panorang partumpuan nami na pensiun i Medan, roh do tong Bapa on. Ijai pe marsaksi do Bapanta on padaskon Ambilan na Madear, janah buei do na lang porsaya nadob iatas 86 taun umur ni Bapanta on.

Sonari nanturang, (maksudni Inang Ny Pdt J Petrus Purba, halani ai do tuturni) hita ganupan. Domma marujung tulang on. Malas ma uhurta sada hatuahon do in, pasu-pasu ni Tuhan do in. Dear do ganup niombah ni tulang on, banggal-banggal. Hanya sedo pitah Bapanta on, sedo pitah Pdt. Perpe, sedo pitah Pdt. Christianus hansa na gabe parnahei na siboan Ambilan na Madear, tapi termasuk ganupan anggota keluarga. Martuah ma na matei ibagas Tuhan in. Amen.

Pematangsiantar, 30 Nopember 2004

Ditranskrip oleh : PH.Simaremare — Lydia Purba

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s