Biografy Singkat

“Ai pe hun ruangan on Pdt.Petrus”, nini sada halak keluarga ni pasient i Paviliun B, RS Umum Pematangsiantar. “Ra hu ruangan na legan do sonari”, nini use manambahi. Memang, ai ma sada ciri khas ni Pdt.Dj Petrus Purba, sobali na igelar homa “Panalin Bibel”. Adong do bani Pandita on sada talenta, rajin manohu na marsitaronon, tarlobih na boritan. Hira adong do bani jadwal tertentu, tiap ari, laho manjumpahi pasient i Rumah Sakit, age i rumah.Lang homa pitah i Pematangsiantar on, tapi dihut do age bani kota na legan, ija tudu ia berkunjung. Nini sada Keluarga ni Pasient do i daerah Jabotabek, “Roh do Pdt.Petrus manonggohon hanami”.

Pdt. Dj Petrus Purba, ai ma sada halak Pandita na bahat itarsingati halak i GKPS. Ia tubuh bani tahun 1920, i Purba Saribu, marhajabuan pakon Inang Lestarina Br Saragih, anjaha dong do 12 niombah bani sidea, 9 dalahi pakon 3 naboru. Dob tamat ia hun HIS bani tahun 1936, itoruskon ma marsikolah i OVO (Normal Leergang) anjaha tamat tahun 1939. Salpu ai, idihuti ma Sikolah Guru i Sipoholon, tamat tahun 1940. Dob tamat Sikolah Guru, gabe guru ma ia anjaha ongga do mangajari i SR Pangambatan sanggah na gabe guru on ma ia, iahapkon dong dilo-dilo ni Tuhan bani, gabe Pandita.

Bani tanggal 28 September 1952, ipasu-pasu ma Pandita on rap pakon 6 halak hasomanni, i Pamatang Raya. On ma homa pamasu-masuon ni Pandita na parlobei i Simalungun. Bani tahun 1956 isuruh ma Pandita on Study hu Jerman. Ase boi do Pandita on marsahap Jerman pakon Inggris.

Laho padoraskon horja ni Tuhan i tanoh Simalungun on, iporluhon tumang do bani panorang ai Evanggelis.Halani ai, bani tanggal 4 Oktober 1956, iangkat ma Pandita on gabe Pandita Evangelis i HKBP Simalungun. Rap pakon panjaeon ni HKBP Simalungun hun HKBP tanggal 5 Oktober 1952, itotaphon ma homa Pandita on gabe Leider Namaposo Kristen Protestan Simalungun (1956-1960), ambah ni tugasni sebagai Pandita Resort Siantar.

Sanggah na gabe Pandita Resort Siantar, bani tanggal 23 Juni 1958 iangkat ma homa Pandita on gabe Panalin Bibel; anjaha tahun 1963 sanggah manjolom horja ai, isuruh ma ia mandihuti Kursus penerjemah Bibel i Manila-Philipina. Mulai tahun 1971-1978 marangkap ma use Pandita on mangidangi gabe Pandita Resort Siantar II.

Bani tanggal 16 Januari 1977, saud ma dong Bibel Simalungun, anjaha on ma Bibel na parlobei secara lengkap (Padan Nabasaia pakon Padan Nabaru) i tongah-tongahta. Dob mangidangi i Resort Siantar II anjaha salosei tugasni sebagai Panalin Bibel, terhitung 1 Januari 1978 iangkat ma Pandita on use gabe Pandita Evangelis Umum. Dob ai bani tanggal 26 Juni 1983 itempathon use gabe Pandita i Resort Siantar V, tapi totap homa sebagai Evangelis Umum.

Sehat do Pandita on age pe buei horja na ampei bani. Bani tanggal 1 Januari 1985, marumur ma ia 65 tahun, anjaha idalanni ma MPP, lanjar sonai ma ia pensiun ronsi sonari.

“Rajin anjaha torus do ia marlajar”, nini sada halak Pandita na dob pensiun homa padas kesanni pasal Pandita on. Taridah do ai age humbani “parambilanonni” na totap segar, halani torus do iikuti perkembangan zaman, ai tanpa torus manlajar anjaha ringgas mambaca, tontu lang jumpah sisonin bani. Bani penampilanni sehari-hari, totap do ipatuduh “na pandita”do ia. Asal marjumpah anjaha marbual pakonsi, ambahni manungkun “kesehatan”, totap do ia “marambilan” anjaha manarsingati hata ni Tuhan. Seng dong “paniseini”, na so marantup hata ni Tuhan.

Hira “kamus berjalan” do ia pasal “hata ni Tuhan in”, anjaha pangkei do pardingatni age bani ayat ni Bibel in.

Sonai ma Pandita on marhitei bagei-bagei ni horja, mangaplikasihon tonah ni Tuhan Jesus na mangkatahon :”Parmahani ma biri-biringKu”. Kental do tonah in ibagas pelayananni sehari-hari. Nini do sahali,”Ai do suruh ni Tuhan in banta selaku Pandita…..”.

Sederhana do hansa goluh ni Pandita on, tapi surung do pasu-pasu bani keluargani, boi do haganup niombahni ipasikolahkon. “Biar bani Jahowa”, ai do motto ni goluhni. Atok ni uhurni bani pasu-pasu ni Tuhan, ai do ihagoluhkon ari-ari. Halani ai, age pe “sunsah parbalanjaan ni pandita”, seng sundat ia pasikolahkon ampa mardiha-diha.

Domma manandangi 20 tahun Pandita on pensiun, tapi seng ongga moru “haringgasonni” bani horja i kuria in. Age pe lambin matua dagingni, idukih anjaha inunut do padas hata ni Tuhan. Kritis ope homa ia mananggapi sagala perkembangan. Ikritisi do homa age pasal ‘logo’ ni GKPS. Nini do,”mase GKPS marlogo silang ampa demban …?.Salpu ai holi aha ?. Ai lang silang do hansa logo ni Gereja i sab dunia on?.

Marambilan, sermon, manohu na boritan, torus do ihorjahon. Nini do gati : ”Parlobei ma totap do ipindahi Harajaon ni Naibata….

Na pinatomu-tomu ni Pdt.M.H Sipayung, Ambilan & Barita GKPS

Dear homa basa hita:

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s